Man Sterf In Minnebron Nadat Rower Hom In Maag Skiet

Een van die drie mans het na die vrou se kant beweeg en haar handsak gegryp.

Die toneel in Davystraat, Minnebron waar die noodlottige skietery plaasgevind het.

‘n 45-Jarige man is vanmiddag noodlottig gewond toe hy en ‘n vrou (ouderdom onbekend), wat saam met hom in ‘n voertuig was, deur drie rowers oorval is.

Die voorval het net voor 4nm in Davystraat, Minnebron plaasgevind.

Volgens kapt Peet van der Schyff, wat op die toneel was, het die man en die vrou by ‘n woning in Davystraat  aangekom, nadat hulle sake by ‘n bank gedoen het.

“Die vrou het bestuur en toe sy in die oprit stilhou het ‘n Wit Volkswagen Polo met drie insittendes glo by hul stilgehou,” het Van der Schyff gesê.

Een van die drie mans het na die vrou se kant beweeg en haar handsak gegryp.

Volgens van der Schyff het ‘n stoeiery eers tussen die man en die ander twee booswigte ontstaan, voordat hulle na hul voertuig terug gehardloop het.

“Een van dié rowers het egter terug beweeg na die man en twee skote op hom afgevuur,” het Van der Schyff gesê.

Die man is in die maag gewond.

Sekuriteitsbeamptes van ‘n sekuriteitsmaatskappy het  die swaar gewonde man na die Life Dalview Kliniek geneem.

“Die persoon is egter oorlede,” het Van der Schyff gesê.

‘n Grootskaalse soektog is tans aan die gang na die drie verdagtes wat in die Polo op die vlug geslaan het.

Brakpan Herald

Enjoyed this post? Share it!