Opgehang, Gemartel, Verkrag En Toe Vermoor – Mooinooi

Anisha (30) en Joey van Niekerk (32) van Mooinooi het op 10 Desember onverklaarbaar verdwyn.

Wynand van Niekerk, die broer van Anisha van Niekerk, sê alle inligting dui daarop dat sy suster en Joey van Niekerk vermoor is deur iemand wat hulle probeer dwing het om hul kleinhoewe by Mooinooi naby Rustenburg te verkoop.

Anisha se broer Wynand Van Niekerk (34) glo die familie en die polisie weet nou wat van die vroue geword het.

Anisha (30) en Joey (32) was getroud.

Sewe mense is al in verband met hul moord in hegtenis geneem, maar tot dusver wou die polisie nie sê hoe hulle met die moorde verbind word nie.

Wynand van Niekerk het die afgelope week gesê dit blyk nou dat Anisha en Joey se moordenaars hul lyke met komberse na ’n spruit gesleep het waar die lyke deur die nag verbrand is en die as weggegooi is.

Rapport het die moordtoneel die afgelope week besoek.

Die vraghouer waar die vroue vermoedelik gemartel en uiteindelik vermoor is. Foto: Wikus de Wet
’n Paar meter van die vraghouer waar die vroue blykbaar gemartel is, is ’n gat wat soos ’n graf lyk. Wynand glo die moordenaars se aanvanklike plan was om hulle daar te begrawe, maar iets het hulle van plan laat verander.

Die moordtoneel is op die kleinhoewe van een van die verdagtes wat die polisie kort ná die vroue se verdwyning in hegtenis geneem het. Die verdagtes is ’n duikklopper, sy seun, dié se 18-jarige meisie en vier van sy werkers.

Wynand sê die duikklopper het ’n werkwinkel op die Van Niekerk-vroue se kleinhoewe en wou die grond koop.

Anisha, wat ’n bestuurder by ’n Anglo-myn in die omgewing was, wou nie die grond verkoop nie. Die dag nadat Anisha en Joey verdwyn het, het die duikklopper aan Wynand gesê die eiendomstransaksie is reeds voor die vroue se verdwyning beklink en hy het hulle met “ ’n sak geld” vir die grond betaal.

Die Vlak Graf.

“Die bedrag wissel. Dit was eers R500 000 en toe R1 miljoen,” sê Wynand. Die polisie kon nog geen spoor van sulke geld vind nie, maar die duikklopper het aan Wynand ’n dokument gewys wat skynbaar ’n kennisgewing van die verandering van eienaarskap is. Die dokument is deur sy suster onderteken.

Nadat die duikklopper gearresteer is, het Wynand ’n dagboek in die werkwinkel ontdek waarin iemand sy suster se handtekening geoefen het.

Hy het dit aan die polisie gegee.

Wynand sê hy het dadelik die ergste vermoed toe hy ’n dag ná die vroue se verdwyning op 10 Desember by hul huis instap.

“Anisha en Joey se huissleutels het daar gelê. Joey se handsak ook, minus haar beursie. Hul tandeborsels was nog op hul plekke en die TV was aan.

“Die aircon in die slaapkamer waar Joey se foon besig was om te laai, was ook aan.”

Die polisie speel nie met hierdie saak nie.

Hy sê dit het nie sin gemaak nie. Die vroue sou daardie dag Pretoria toe ry om Joey se pa te gaan uitken nadat hy aan natuurlike oorsake dood is.

Wynand sê uit die toestand van die huis was dit duidelik dat hulle nie daar weg is om Pretoria toe te ry nie.

Hy glo iemand het hulle uit die huis gelok of ontvoer.

“Ons sal seker nooit weet watter een (van die twee) nie. Met ’n sak geld of ’n wapen teen die kop?” sê Wynand.

Hy glo hulle is waarskynlik by die werkwinkel oorval en na die duikklopper se kleinhoewe sowat 15 minute se ry daarvandaan geneem waar hulle eers gemartel en daarna vermoor is.

Wynand vermoed die vroue is die Sondag, die dag van hul verdwyning, reeds vermoor.

Die familie het om 14:00 daardie dag nog via WhatsApp met hulle kontak gehad.

Dieselfde aand het iemand by ’n kitsbank probeer om geld uit ­Anisha se bankrekening te onttrek.

Die vroue is vermoedelik voor hulle dood met toue aan dié ringe opgehang en gemartel. Foto: Wikus de Wet
Twee dae later het die polisie die eerste verdagte in hegtenis geneem.

“Die polisie speel nie met hierdie saak nie. Toe ons die Dinsdagoggend by die polisiekantoor instap, sit daar reeds ’n generaal en twee ander senior offisiere. Hulle het ’n spesiale taakmag saamgestel en dieselfde dag nog toegeslaan.”

Die taakmag het in twee verdeel en op dieselfde oomblik op die kleinhoewe met die werkwinkel en die woonhuis sowel as die duikklopper se kleinhoewe toegeslaan.

“Dit was ongelooflik. Helikopters, berede polisie en hul perde, vangwaens, die hele SAPD het opgedaag,” sê Wynand.

Al sewe beskuldigdes het Vrydag in die landdroshof in Brits om borgtog aansoek gedoen. Die staatsaanklaer was nog nie reg om voort te gaan nie en twee van die beskuldigdes wag nog vir regshulp.

Hulle word aangekla van onder meer verkragting, moord en menseroof.

Die duikklopper se seun het by die hof gesê sy pa sou nooit so ’n misdaad pleeg nie. “Hy het net mense gehelp. Met geld, met moeite, met alles.”

Brig. Sabata Mokgwabone, polisiewoordvoerder in Noordwes, het bevestig die moorde hou met ’n eiendomstransaksie verband.

Image may contain: plant, tree and outdoor
Deur:  Anton Koen

Enjoyed this post? Share it!