Gewapende Roof – Rower Doodgeskiet – Vanderbijlpark

Om in die oggend-ure wakker gemaak te word deur rowers is vir enige gesin ‘n nagmerrie in ons huidige samelewing maar as mens voorbereid is om jouself en jou gesin te beskerm, maak dit jou wil op oorlewing soveel groter.

‘n Egpaar wat op 27 Oktober, hul eerste aand in hul nuwe huurhuis in Pattersonstraat, SE2 geslaap het, was egter voorbereid toe die man skielik vanoggend wakker word met een van vier gewapende rowers half bo-oor hom.

Volgens die eienaar van die huis is die egpaar besig om te trek vanaf Potchefstroom en het die nag vir die eerste keer in die huis geslaap. Toe die man teen ongeveer 03:00 wakker word, het hy as ervare jagter soos altyd ‘n vuurwapen by hom gehad.

Hy het met die eerste skoot die rower in die bo-lyf geskiet. Die tweede skoot was reg in die voorkop. Tussendeur het van die ander rowers, wat al drie gewapen was, begin skiet. Die man is in beide bene getref. Die rowers het daarna op vlug geslaan. Daar is sprake dat die vrou ook gewond is maar kon nog nie bevestig word nie.

Die man is tans in die hospitaal en word gelukkig net vir twee vleiswonde in sy bo-bene behandel. Volgens die eienaar van die huis was dit net ‘n seëning dat die egpaar se kinders nie daar was nie.

Die eienaar van die huis het aan Vaalweekblad vertel dat ‘n man deur die week terwyl hulle die huis voorberei het, voor die huise in die straat rongedwaal het en ook gevra het vir werk. Dit was dieselfde man wat deur die huurder doodgeskiet is.

Die saak word deur die polisie ondersoek.

Vaalweekblad

Enjoyed this post? Share it!